This page is intended for users in Germany. Go to the page for users in United States.

【粒粒皆辛苦】值得你留低十年嘅公司?

撰文:Wantedly編集部

大家睇完個標題可能會諗:咩年代呀?一間公司做十年?痴線㗎咩?筆者初初都係咁諗,但同Seito嘅一班「老臣子」傾完偈之後,先發現原來「凡事都有可能」。

開始之前先講吓Seito嘅來頭,佢哋其實係一間專做POS (Point-of-Sales)系統嘅公司。換言之,大家喺每一間餐廳、舖頭見到落單同埋數嘅機,例如吉野家甚至香港大學嘅canteen,都有佢哋嘅「腳毛」㗎!

講到呢度,大家可能會覺得Seito做緊嘅嘢好outdate,但其實佢哋嘅business早就發展到去東南亞同內地,喺香港亦都有接近100個staff,唔係你以為食餐飯真係咁容易呀?裡面原來牽涉好多technology㗎。

Kevin – Project Manager(左), 阿超 – Product Management Director(右)

/學生哥/好溫功課/

如果大家同筆者差唔多年齡的話,相信細細個都會聽過呢首歌,但唔通唔鍾意讀書就一事無成咩?

就好似阿超咁,本來就唔鍾意讀書,但喺度做咗幾年之後就發覺自己需要進修:「其實公司一路都好鼓勵我哋進修,由Degree一路去到eCommerce嘅Master,一直都有sponsor我哋去讀書同upgrade自己。」佢仲話公司好想佢哋將出面學咗嘅嘢帶返去公司,學以致用。

亦都係因為咁,Kevin話公司請人最唔睇嘅就係學歷:「學歷呢樣嘢其實好死,反而你個人嘅本質先係重點,好似我project department咁,最睇嘅就係性格同soft skills,因為我哋呢邊成日都要同客溝通。」

公司除咗出錢大力支持班同事之外,管理上亦都好flexible咁配合同事嘅需要。阿超就最鍾意Seito嘅自由度:「喺度做嘢唔會好似其他傳統公司咁,大家冇嘢做又要鬥OT,做哂啲嘢咪準時走。如果有事想早啲走,咁咪早啲返,唔會『焗』你跟足放工時間。」就好似阿超早兩年讀part time Master咁,佢好多時收工要趕去上堂,於是咪早啲返早啲走。

當然啦,喺邊間公司都好,如果你想一直向上走,而又需要用到啲technical嘢,你唔進修都真係幫你唔到啦,而家最正係Seito會畀錢你讀呀嘛。

見阿Paul (Operations Manager)笑成咁,就知佢個人幾和善啦

「拍拖都冇拍咁耐」

做咗成14年嘅阿Paul,除咗話自己「拍拖都冇拍咁耐」之餘,仲話「離不開」嘅原因係見到自己改變公司:

「因為我哋呢個department喺non-office hour係要有同事on call嘅,我仲記得以前做嗰陣冇補水又冇補假,可能公司都係本住個『份糧包埋』嘅心態啦,但我之後就同老闆講公司有咩問題,佢聽完我講就開始改,變咗而家個policy完善咗好多。」

佢仲話自己後生嗰陣成日都「射波」,搞到老闆頂唔順要搵佢「傾偈」,但點知佢冇畀人炒之餘,老闆仲問佢因咩事,使唔使幫手咁。

而就係因為呢次「感召」,佢就發現公司對一班同事都好包容,當然佢都冇再射波啦。(好似係)

咁唔知老闆Norman又係一個點嘅人呢?

「最緊要係practical」

點解咁唔睇重學歷,因為Norman可以support班同事去進修,但如果一個人嘅mindset唔夠「貼地」,就符合唔到Seito嘅本質:「我哋始終都係做POS,所以個system幾innovative都好,最後都係要『落舖』畀客用,所以啲客對個system嘅要求好高,而我哋除咗要provide個易用嘅system之外,仲要諗啲新嘅idea去fit唔同嘅business。」

而且Seito而家嘅業務要cover成個亞太區,真係要「百貨應百客」先得。

所以喺請人嘅時候,除咗性格同能力之外,Norman更加重視嘅係一個人嘅potential:「如果我而家係請緊啲management嘅位,當然我會比較著重佢嘅能力,因為我需要佢去帶住一班人;但如果我係請緊啲junior嘅位,只要佢有potential我就一定會畀機會。」

佢覺得而家嘅年輕人,好多時可能因為差咗啲經驗、training、skill set或者學歷,令到好多公司都會拒絕,但Norman就話:「呢啲佢哋冇嘅,咪我哋畀佢,咁大家先可以一齊成長。」

亦都係因為呢種「實幹派」嘅性格,Norman對好多事都不拘小節:「之前有同事話想返工聽歌,咁其實啲engineer寫code嘅時候聽歌又真係會productive啲,大家都開心咁有咩所謂;又或者我留意到有同事做得唔係咁開心,咁咪同佢傾吓轉department。我始終覺得應該係『工』去match一個人,而唔係逼一個人去打份工。」

或者有啲時候,大家搵工會先睇公司同行業傳唔傳統,但「傳統」又係咪等於「守舊」呢?想知一間公司係好定壞,都係嗰句, interview完就知咩事,但你唔試就永遠都唔會知。

後記:講到公司嘅好嘢,Kevin就話原來佢哋可以出公數,一年去一、兩次旅行:「因為Project Team呢邊有啲peak season要追同睇住好多project,所以過咗peak season之後公司都會慰勞吓班手足。」除咗旅行之外,佢哋仲會成班人出去「食好西」,又係「阿公」畀,聽落真係幾爽…

講咩都假,見咗先算😤

Seito POSs Stellenangebote
8 Likes
8 Likes

Wöchentliches Ranking

Weitere Rankings anzeigen
Hat dir diese Story gefallen? Dann schau doch mal bei uns vorbei.