This page is intended for users in Germany. Go to the page for users in United States.

Wantedly Journal | 仕事でココロオドルってなんだろう?

Company

輟學資優生:唔讀大學 ≠ 唔成功!

啲人成日話Bill Gates 同 Steve Jobs冇讀大學咪一樣咁成功乜乜乜…你以為呢個世界上真係咁多個Bill Gates咩?知唔知邊啲人唔駛Degree都會成功呀?咪就係「人哋」囉~

2018/10/12

而呢個「人哋」遠在天邊,近在眼前…有請年紀輕輕就成為IT界之花嘅Clara Chau~~(Woohoo~)

「好地地做乜唔讀書?」

雖然Clara啱啱成年冇耐,但其實佢已經有屬於自己嘅事業!原來佢自細就係資優生,成績好,又參加好多課外活動,即係老師口中要我哋模仿嘅「榜樣」呀~

當大家以為Clara會繼續乖乖地讀書,然後升大學,最後出嚟搵份穩穩定定嘅工之際,佢就向大家完美示範咗成功同成績其實冇掛勾嘅:雖然佢中學都未讀完就已經輟學,但而家已經幫一間公司做Data Scientist兼顧問,仲做到有聲有色𠻹~

「豁出去漫遊,不通知親友~」

喺飛機上coding,享受自由自主嘅工作模式

Clara嗰陣面對住學業壓力,有一日佢終於忍唔住…要爆喇!而佢爆嘅方法其實一啲都唔爆…只係拍拍籮柚離家出走(雖然都資料搜集咗幾日)。屋企人覺得佢只係一時衝動,一個星期之後就會喊曬口咁返屋企,但事實證明…佢真係要走佬呀:「衝動係嚟自勇氣,而勇氣係好短暫,既然都有一時嘅衝動,不如就把握當下嘅衝動,做自己想做嘅嘢啦!」

Clara仲話,就算每個人將自己嘅人生Plan到十全十美,都唔保證佢一定會發生。就好似佢咁,小學開始好中意Physics,仲幻想自己會入MIT,又有邊個會估到,佢最後做咗工程師喎:「我覺得每個人擁有嘅只係當下,未來嘅嘢始終係未來,把握當下嘅感覺比較實在。」

問到佢有冇擔心自己因為衰衝動,而搞到大把手尾執,佢就話擔心其實好無謂,如果要擔心呢樣擔心嗰樣,不如相信自己可以搞得掂好過:「未來無辦法控制,只能控制當下嘅心態。」(Chau, 2018)。

怪唔之得,佢話好難做啲令自己後悔嘅事啦,原來係因為佢肯接受現實,接受未來,呢種冒險精神真係好值得人欣賞呀!

「資優生乖乖地讀書咪算囉…」

嗱嗱嗱~Clara多次強調自己唔係因為反叛而唔返學,更加唔係鼓勵大家唔讀書呀!佢只係覺得學校嘅教科書,已經滿足唔到佢強大嘅求知慾,加上公開試壓力太大,搞到自己精神緊張,仲成個人瘦曬…

佢話離開咗學校,返工學到嘅嘢,反而更加實用同埋充實呀:「而家科技咁發達,喺資訊咁流通嘅社會度,想學咩都可以自己搵Source學到,無論係咪返學,只要有心就一定可以學到嘢!」

Clara不時都會被邀請去各種活動,講解Data相關嘅商業策略

「唔使返學,一定好開心啦?」

想錯你個心呀…唔使做呀而家?Clara同好多Fresh Grad一樣,出到嚟做嘢,先知個世界係咁殘酷!

特別係佢啱啱做嘢嗰陣,唔單止冇經驗冇學歷冇人脈冇支持,好多人仲因為佢只係𡃁妹而蝦佢。不過佢話,最緊要係變得堅強啲,反省下自己邊度做得唔好,撞板撞得多,學到嘅嘢自然更加多~

「後記」

歌仔都有唱「前路漫無邊際」,你唔試下又點知唔得呢?雖然每個人嘅性格都唔一樣,但當覺得自己與眾不同嘅時候,不妨試下跳出框框~雖然身邊嘅人可能會極力反對,甚至話要脫離關係(呢個誇張咗),如果你真係決定要瞓身做,就算跌到一仆一碌咁,都叫為自己努力過!

最後,小編要戴返個頭盔:每個人嘅性格都唔一樣,喺Clara身上發生嘅事,換咗第二個未必可行,畢竟每個人嘅性格都唔一樣,所以…最緊要就係知道自己想點!

💡🙋🏻‍♀️ 見Clara真人:Wantedly x The Wave『求職市集』!

下星期Clara會嚟到我地嘅『求職市集』分享佢成為Data Scientist嘅心路歷程~大家有興趣了解更多或者搵Clara傾偈就按 "Want to Visit" 登記喇!


. . .

睇吓有咩好工啱你啦 👉 http://wantedly.com/projects

成立於2010年,Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來,取代重視利益關係的傳統配對。在日本有超過27,000間公司使用Wantedly,每月活躍用戶達到250萬個。我們的服務已拓展至新加坡,現在更進駐香港!
  • Written by

    Wantedly編集部

WEITER